Тошкент шаҳрининг Янгиҳаёт туманида ташкил этилган сайёр қабулда турли вазирлик ва идоралар масъул раҳбар ходимлари, шу жумладан, Марказий банк раиси ўринбосари бошчилигидаги ишчи гуруҳ ҳам иштирок этди.
Сайёр қабулда ҳар бир фуқаро мурожаати тингланиб, муҳокама этилди. Кўплаб масалалар жойида ҳал этилган бўлса, вақт талаб қилинадиган мурожаатлар бўйича тегишли масъулларга топшириқлар берилди.
Фуқароларга банк хизматлари истеъмолчилари ва тадбиркорлик фаолияти субъектларининг ҳуқуқлари бўйича билимларини ошириш мақсадида турли тавсиялар берилди ва саволларига батафсил жавоблар қайтарилди.
Янгиҳаёт, Сирғали ва Чилонзор туманлари ҳудудида истиқомат қилувчи фуқароларнинг тадбиркорлик фаолиятини бошлаш ва кенгайтириш учун кредит ажратилишида амалий ёрдам кўрсатиш, ипотека кредитлари олиш ва бошқа масалалардаги мурожаатлари юзасидан зарурий йўл-йўриқлар кўрсатилди ва уларнинг ижросини таъминлаш тижорат банклари масъулларига бириктирилди.
