Жорий йилнинг 29 ноябрь куни Марказий банкда Молиявий оммабоплик альянси (МОА) Ижрочи директори А.Ханниг бошчилигидаги делегация ташрифи доирасида ташкилотнинг раҳбарияти ва экспертлари билан учрашувлар бўлиб ўтди. Улар билан молиявий оммабопликни, молиявий саводҳонликни ошириш ҳамда молиявий хизматлар истеъмолчиларининг ҳуқуқларини ҳимоя қилишнинг самарали тизимини таъминлаш масалалари муҳокама қилинди.
Марказий банк томонидан иттифоққа аъзо давлатлар билан тажриба алмашиш ва техник ёрдам кўрсатиш орқали МОА билан ўзаро ҳамкорлигини кенгайтириш бўйича келишувга эришилди.
Шу билан бирга, МОА Ижрочи директори Банк мутахассисларини қайта тайёрлаш корпоратив марказида банкнинг ёш мутахассислари ва мамлакатнинг бир қатор олий ўқув юртлари талабалари, жумладан, Тошкент молия институти, ТДИУ, ЖИДУ талабалари учун “Молиявий оммабоплик: эволюция ва замонавий муаммолар” мавзусида маъруза қилди.
Молиявий оммабоплик альянси (МОА) Ижрочи директори А.Ханниг бошчилигидаги делегация ташрифи
Янгиланган сана:
2 Дек 2019, 12:10
