Марказий банкда Молиявий секторни баҳолаш дастури (FSAP) доирасида Халқаро валюта жамғармаси ва Жаҳон банки экспертлари билан учрашув бўлиб ўтди.
Учрашувда Марказий банк раиси М.Нурмуратов Молия секторини баҳолаш дастури (FSAP) мамлакат молия секторининг барқарорлигининг таҳлили ва янада ривожланишида асосий восита сифатида муҳим аҳамият касб этишини алоҳида таъкидлади.
Халқаро валюта жамғармаси ва Жаҳон банкининг тажрибали экспертларидан иборат қўшма гуруҳи мавжуд норматив-ҳуқуқий базани ҳамда тўлов ва ҳисоб-китоб тизимини, шунингдек банк ва нобанк молия секторлари барқарорлигини таҳлил қилади. Шу билан бирга, баҳолаш миссияси доирасида стресс-тестлар, тизимли рискларни, жумладан, банклар ва нобанк ташкилотлари ўртасидаги алоқалар таҳлил қилинади ҳамда молия регуляторларининг тизимли стресс шароитида самарали тартибга солиш қобилиятлари баҳоланади.
Баҳолаш дастурида Марказий банкдан ташқари, Иқтисодиёт ва молия вазирлиги, Истиқболли лойиҳалар миллий агентлиги, тижорат банклари ва бошқа тегишли идоралар ҳам иштирок этади.
Маълумот учун: Молия секторини баҳолаш дастури ХВЖ ва Жаҳон банки томонидан 1999-йилдан буён мамлакатлар молия сектори барқарорлигини ҳар томонлама ва чуқур таҳлил қилиш мақсадида ўтказиб келинмоқда. Бунда, ХВЖ барқарорлик жиҳатларига ва Жаҳон банки молиявий тизимни ривожлантириш эҳтиёжларига эътибор қаратади. Баҳолаш дастури натижалари бўйича келгусида ислоҳотларни амалга ошириш, шунингдек, молия тизимининг салоҳиятини оширишга кўмаклашиш бўйича тавсиялар берилади.
