Марказий банкда ЕТТБ вакиллари билан учрашув бўлиб ўтди

Марказий банк раҳбарияти Европа тикланиш ва тараққиёт банки (ЕТТБ) делегацияси билан учрашув ўтказди.

Учрашув давомида томонлар рисклар билан боғлиқ жиҳатларга алоҳида эътибор қаратиб, мамлакат молия секторидаги мавжуд вазиятни муҳокама қилдилар. Таъкидланганидек, макроиқтисодий барқарорликни таъминлаш бўйича Марказий банк томонидан кенг кўламли чора-тадбирлар амалга оширилмоқда.

Шунингдек, томонлар банк тизимининг ривожланиш стратегиясига мувофиқ давлат банкларини трансформациялаш ва хусусийлаштириш жараёнини муҳокама қилдилар. ЕТТБ вакиллари пандемия даврида ва глобал ноаниқликлар шароитида регуляторнинг банк тизимини қўллаб-қувватлашга қаратилган ҳаракатларини юқори баҳоладилар.

Учрашув якунида томонлар муҳокама қилинган масалалар бўйича ҳамкорликни янада кенгайтиришга келишиб олдилар.