Марказий банкда Жаҳон банки мутахассислари томонидан Марказий банкнинг тўлов ташкилотларини назорат қилиш тузилмаси салоҳиятини ошириш бўйича техник кўмак миссияси якунларига доир учрашув бўлиб ўтди.
Миссия давомида Тўловлар ва бозор инфратузилмаси қўмитаси (CPMI) ҳамда Қимматли қоғозлар комиссиялари халқаро ташкилоти (IOSCO) томонидан қабул қилинган Молиявий бозор инфратузилмаси тамойилларини ўрганиш бўйича амалий семинарлар ташкил этилди.
Учрашувда миссия натижалари таҳлил қилиниб, мамлакат тўлов тизимларини ривожлантириш стратегиясини ишлаб чиқишда ҳамкорлик қилишга келишиб олинди.
Шунингдек, Жаҳон банки томонидан мамлакатнинг тўлов тизимларини баҳолаш натижалари юзасидан тақдим этилиши кутилаётган ҳисоботда асосий эътибор қаратилиши керак бўлган соҳалар муҳокама қилинди.
