Ҳужжатнинг мақсади ногиронлиги бўлган шахслар учун молиявий хизматлардан тенг ва қулай фойдаланишни таъминлаш мақсадида мавжуд шарт-шароитларни ўрганиш, методологик асосларни шакллантириш, жисмоний эҳтиёжларни инобатга олган ҳолда банк инфратузилмасини мослаштириш, шунингдек молиявий саводхонлик бўйича ўқув материалларини ишлаб чиқишдан иборат.
Чора-тадбирлар режаси молиявий хизматлардан фойдаланишда ногиронлиги бўлган шахслар дуч келаётган тўсиқлар ва муаммоларни аниқлаш бўйича тадқиқотлар ўтказиш, молиявий ташкилотлар учун ногиронлиги бўлган шахсларни қўллаб-қувватлаш ва уларга хизмат кўрсатиш бўйича йўриқнома ишлаб чиқиш, шунингдек молиявий саводхонлик бўйича ўқув материалларини ишлаб чиқиш ва мослаштиришни ўз ичига олган амалий ва таҳлилий вазифалар мажмуасини амалга оширишни назарда тутади.
Ушбу чора-тадбирлар режасини амалга ошириш барча аҳоли қатламлари учун тенг имкониятларни таъминлаш ва молиявий хизматлар сифатини оширишга қаратилган инклюзив молиявий тизимни ривожлантириш йўлидаги муҳим қадам ҳисобланади.
