2 март куни Ўзбекистон Марказий банки раиси Тимур Ишметов ва раис ўринбосари Нодирбек Ачилов бошчилигида Словакия Миллий банки вакилларини 6 мартга қадар давом этадиган расмий ташриф билан қабул қилди. Делегация Словакия Миллий банки раиси Питер Кажимир ҳамда Тадқиқотлар, статистика ва иқтисодий таълим бўлими ижрочи директори Райнер Мартиндан иборат.
Ташриф Ўзбекистон Марказий банки ва Словакия Миллий банки раислари ўртасидаги икки томонлама учрашув билан бошланди. Унда томонлар жорий макроиқтисодий ривожланишлар, пул-кредит сиёсати устувор йўналишлари ҳамда институционал ҳамкорликни мустаҳкамлаш истиқболлари юзасидан фикр алмашдилар. Ўзбекистон Марказий банки раиси ўринбосари Нодирбек Ачилов ҳамда Словакия Миллий банки вакиллари ўртасида ўтказилган навбатдаги учрашувда тадқиқот ва таҳлилий фаолият йўналишида ҳамкорликни кенгайтириш масалалари муҳокама қилинди. Хусусан, тадқиқот методологиялари, маълумотларни йиғиш амалиёти ва таҳлилий ёндашувлар бўйича тажриба алмашиш масалаларига эътибор қаратилди.
Ташрифнинг иккинчи куни Словакия Миллий банки раиси Питер Кажимир “Трансформация, интеграция ва пул-кредит сиёсатининг янги чегаралари” мавзусида асосий маъруза билан чиқиш қилди. Унда Словакиянинг иқтисодий трансформация ва интеграция жараёнидаги тажрибаси, шунингдек, пул-кредит сиёсатининг ўзгариб бораётган роли ҳақида фикрлар билдирилди. Райнер Мартин эса “Словакия Республикасининг макропруденциал сиёсат бўйича тажрибаси” мавзусида тақдимот ўтказиб, унда макропруденциал таҳлил ҳамда далилларга асосланган сиёсатни шакллантиришда тадқиқотларнинг ўрни алоҳида таъкидланди. Сессия Марказий банк мутахассислари, стипендия дастури тингловчилари ҳамда академиклар ва университетлар вакиллари иштирокида ўтказилган интерактив савол-жавоб билан якунланди. Савол-жавоб жараёнида иштирокчилар тадқиқот амалиёти, таҳлилий ёндашувлар ва институционал тажриба юзасидан саволлар бердилар.
Дастур икки марказий банк ўртасида тадқиқотлар, маълумотларни йиғиш ҳамда таҳлилий салоҳиятни ривожлантириш йўналишларида ҳамкорликни янада чуқурлаштиришга қаратилган семинар ва учрашувлар билан давом этади.
