Ўзбекистон Республикаси Марказий банки 2023 йил 18-февралдаги 4/13-сонли қарори билан тасдиқланган “Тизимли аҳамиятга молик банкларни аниқлаш тартиби тўғрисида”ги низомга асосан 2025 йил учун тизимли аҳамиятга молик банклар рўйхатини тасдиқлади. 2024 йил 1 октябрь ҳолатига уларнинг Ўзбекистон банк тизимининг активлардаги улуши 67 фоизни ташкил этмоқда.
Тизимли аҳамиятга молик банкларни аниқлашда қуйидаги мезонлардан фойдаланилди:
- банкнинг актив ва мажбуриятлари ҳажми;
- банкнинг банк тизими иштирокчилари билан ўзаро боғлиқлиги;
- банкнинг қамрови;
- банк операциялари мураккаблиги.
Тизимли аҳамиятга молик банкларни аниқлаш бўйича ҳисоб-китоб натижаларига кўра, Банк назорати қўмитаси томонидан қуйидаги банклар 2025 йил учун маҳаллий тизимли аҳамиятга молик банклар сифатида белгиланмоқда:
- “Ўзмиллийбанк” АЖ
- “Агробанк” АТБ
- Ўзсаноатқурилишбанк” АТБ
- АТ “Халқ банки”
- “Ипотека-банк” АТИБ
- “Капиталбанк” АТБ
- “Асакабанк” АЖ
Ўз навбатида, тизимли аҳамиятга молик деб топилган банклар учун алоҳида банк назорати ўрнатилади. Тизимли аҳамиятга молик банкларнинг тўловга қобилиятли бўлиши нафақат молия тизимининг, балки бутун иқтисодиётнинг барқарорлигини мустаҳкамлашга хизмат қилади.
