2022 йил учун молиявий барқарорлик шарҳида макромолиявий заифликлар, молиявий барқарорликка таъсир кўрсатиши мумкин бўлган хатарлар, банк сектори, кўчмас мулк бозори, турли хил шокларга банк тизимининг бардошлилик ҳолати каби масалалар қамраб олинган.
Молиявий барқарорликка таъсир кўрсатиши мумкин бўлган хатарларни соддароқ ифода этиш мақсадида Молиявий заифликлар харитаси ишлаб чиқилди.
Шунингдек, 2022 йилда жаҳондаги молиявий шароитлар ҳолати ҳамда 2023 йилда халқаро банк тизимида юзага келган ноаниқликлар ҳамда молиявий барқарорлик хатарлари таҳлил қилинди.
Банк сектори қисмида Ўзбекистон банк тизимидаги умумий стресс ҳолатини аниқлаш ва ягона умумий кўрсаткичга келтириш мақсадида молиявий стресс индекси ишлаб чиқилди ҳамда 2022 йил якунига Ўзбекистонда банк тизимининг молиявий стресс ҳолати яхшиланганлиги аниқланди.
Кредит бозори, банкларнинг молиявий барқарорлик ва банк тизими бардошлилиги ҳолатлари бўйича хатарлар харитаси, банк тизимининг молиявий барқарорлик кўрсаткичлари, шу жумладан қарз юки хатарлари таҳлил қилинди.
Бундан ташқари, кўчмас мулк бозори қисмида уй-жойнинг фундаментал нархи аниқланди ҳамда уй-жой нархларининг бозор ва фундаментал нархлари ўртасидаги тафовут сабаблари батафсил ёритилди.
Асосий ва хатарли сценарийлар асосида макро стресс-тест натижалари олинди. Ўз навбатида, хатарли сценарийга кўра капитал монандлиги кўрсаткичи бўйича минимал меъёрий талабни бажара олмаган банкларнинг эҳтимолий дефолтга учрашининг бошқа банкларга тарқалиш хавфи баҳоланди. Бундан ташқари, хатарли сценарий учун алоҳида қўшимча шоклар бериш орқали банк тизими бардошлилиги баҳоланди.
Ушбу шарҳда Ўзбекистонда контрциклик капитал буферини жорий қилиш имкониятлари бўйича дастлабки ўрганишлар натижалари ҳам қамраб олинган.
