Аҳоли ва тадбиркорларнинг инфляцион кутилмалари
Инфляцион кутилмалар аҳоли, бизнес ва молия бозорлари иштирокчиларининг келгусидаги нархлар ўзгариши бўйича кутилмаларини акс эттирувчи муҳим кўрсаткич ҳисобланади. Улар жорий инфляция ва иш ҳақи даражаси, истеъмол ва инвестицион фаолликка сезиларли таъсир кўрсатади.
Тадбиркорлар ўз маҳсулотлари учун нарх белгилашда инфляцион кутилмаларига асосланади. Улар инфляциянинг тезлашишини кутган тақдирда келгусидаги нарх ўзгариши билан боғлиқ қўшимча харажатларини қоплаш учун нархларни олдиндан оширишлари мумкин.
Шунингдек, ишчиларнинг нархлар ўсиши тезлашиши бўйича хавотирлари иш ҳақини оширишга бўлган талабларининг ортишида намоён бўлади. Бу эса иш берувчиларнинг иш ҳақи харажатлари ошишида ва маҳсулотнинг якуний нархи қимматлашишида ўз аксини топади.
Талаб нуқтаи назаридан эса истеъмолчилар келгусида нархлар ўсишидан хавфсираб, келажакдаги эхтиёжлари учун товарларни олдиндан харид қилишининг натижасида жорий эҳтиёждан юқорироқ талаб шаклланиб, бу нарх-навонинг ўсишига олиб келади.
Ўзбекистон Республикаси Марказий банки пул-кредит сиёсатини ишлаб чиқишда аҳоли ва тадбиркорларнинг инфляцион кутилмаларини ўрганиш, таҳлил қилиш ҳамда уларни инфляциянинг 5 фоизлик таргети атрофида барқарорлашишига алоҳида эътибор қаратади.
