Самарқанд шаҳрида бўлиб ўтган Осиё тараққиёт банкининг 59-йиллик йиғилиши доирасида Ўзбекистон Республикаси Марказий банки вакиллари Zuercher Kantonalbank вакиллари билан халқаро резервларни бошқариш, пул ва валюта бозорларидаги операциялар, олтин савдоси ҳамда профессионал таълим соҳасидаги ҳамкорликни муҳокама қилди.
Учрашувда резервларни бошқаришдаги жорий тенденциялар, жумладан, пул оқимларини бошқариш, янги молиявий инструментларга инвестиция киритиш ҳамда қатъий даромадли қимматли қоғозларнинг роли ортиб бораётгани юзасидан фикр алмашилди.
Томонлар Марказий банк ва Zuercher Kantonalbank ўртасидаги ҳамкорликнинг жорий ҳолатини кўриб чиқди. Ушбу ҳамкорлик 2019-йил июнь ойида бошланган бўлиб, ўшандан буён мунтазам институционал алоқалар ва профессионал мулоқот орқали ривожланиб келмоқда. Ҳамкорлик молия бозорларидаги бир қатор йўналишларни, жумладан, пул бозори, қимматбаҳо металлар бозори ва валюта операцияларини қамраб олади.
Zuercher Kantonalbank вакиллари пул бозори ҳамкорликнинг муҳим йўналишларидан бири бўлиб қолаётганини таъкидлади. Томонлар, шунингдек, олтин савдоси, валюта операциялари ва Zuercher Kantonalbankнинг ўқув дастурларида иштирок этиш бўйича келгусидаги ҳамкорлик масалаларини муҳокама қилди.
Учрашув якунида томонлар профессионал мулоқотни давом эттириш ва ўзаро манфаатли йўналишларда ҳамкорликни янада ривожлантиришга тайёрлигини билдирди.
