Халқаро валюта жамғармаси, Европа тикланиш ва тараққиёт банки ҳамда OG Research халқаро консалтинг ташкилоти тавсияларига мувофиқ Марказий банк томонидан 2026 йил 16 июлдан бошлаб Марказий банкнинг 7 кунлик облигациялари ўрнига Марказий банкнинг 7 кунлик репо аукционлари билан ликвидликни жалб қилиш амалиёти йўлга қўйилди.
Бунда:
- Марказий банк репо аукционларида олди-сотди предмети сифатида фойдаланиладиган облигациялар нархини даромадлилик эгри чизиғи маълумотларидан келиб чиқиб ҳисоблаш;
- облигациянинг сўндириш муддати репо битимининг иккинчи қисмини ижро этиш муддатидан камида 5 календарь куни кейин келиш кераклиги бўйича талабни бекор қилиш;
- банклар томонидан репо аукционларида сотиб олинган облигацияларни репо муддати давомида иккиламчи бозорда муомаласини чеклаш амалиётини бекор қилиш;
- Марказий банк томонидан банклардаги кутилмаган ликвидлик тебранишларини юмшатиш мақсадида «тўғрилаш» репо аукционларини ўтказиш;
- Марказий банк облигацияларининг чиқарилиши ва муомаласи бўйича бухгалтерия ҳисобини юритиш тартиби жорий қилинди.
Мазкур ўзгартиришлар банк тизимидаги ортиқча ликвидлиликни янада самарали бошқариш ва пул-кредит сиёсати трансмиссияси самарадорлигини оширишга хизмат қилади.
