BMTning Taraqqiyot dasturi vakillari bilan uchrashuv

Markaziy bank rahbariyatining BMT Taraqqiyot dasturi (BMTTD)ning O‘zbekistondagi vakillari bilan uchrashuvi bo‘lib o‘tdi. Muloqot davomida ishbilarmon doiralar, moliya tashkilotlari va tijorat banklari bilan amalga oshirilgan qo‘shma loyihalar muhokama qilindi.

BMT taraqqiyot dasturi vakillari O‘zbekistonning moliya sektorida “yashil moliyalashtirish” bo‘yicha katta salohiyat mavjudligini ta'kidlab, O‘zbekiston Respublikasi Markaziy banki bilan qo‘shma loyihalar yo‘nalishlarini kengaytirishni taklif qilishdi.

Shuningdek, uchrashuvda qurilayotgan uy-joylar uchun “yashil kreditlar”ga subsidiyalar ajratish tartibini yo‘lga qo‘yish hamda qayta tiklanadigan energiya manbalarini (quyosh panellarini) kengaytirish orqali O‘zbekistonda energiya samarador qishloq turar-joy binolarini qurishni rivojlantirishga ko‘maklashish loyihasini amalga oshirishga kelishib olindi.