Joriy yilning III choragida iqtisodiyotdagi inflyatsion kutilmalar bo‘yicha o‘tkazilgan so‘rovlar natijalariga ko‘ra inflyatsiyaning aholi va tadbirkorlik sub’ektlari tomonidan sezilgan va kutilayotgan darajalarida sezilarli o‘zgarishlar kuzatildi. Jumladan, yilning birinchi yarmidagi pasayishdan so‘ng mazkur ko‘rsatkichlar iyul oyidan boshlab oshib bordi.
Xususan, III chorakda inflyatsion kutilmalarning oshishiga respondentlarning kelgusidagi qishloq xo‘jaligi mahsulotlari narxi, kommunal to‘lovlar tarifi va ish haqi oshishiga bo‘lgan ishonchlari ortgani ta’sir etgan. Shu bilan birga, oxirgi oylar davomida milliy valyuta almashuv kursining qadrsizlana boshlashi sentabr oyidagi kutilmalarda o‘z aksini topdi.
Shuningdek, ma’muriy tarzda tartibga solinadigan narxlarning rejalashtirilayotgan erkinlashtirilishi kelgusida inflyatsion kutilmalarni yanada ortishiga hamda bir vaqtning o‘zida narxlarga bir necha omillarning salbiy ta’siri inflyatsion kutilmalarning yuqori darajada saqlanib qolinishiga sabab bo‘lishi mumkin.