O‘zbekiston Respublikasi Markaziy banki 2023-yil 18-fevraldagi 4/13-sonli qarori bilan tasdiqlangan “Tizimli ahamiyatga molik banklarni aniqlash tartibi to‘g‘risida”gi nizomga asosan 2025-yil uchun tizimli ahamiyatga molik banklar ro‘yxatini tasdiqladi. 2024-yil 1-oktabr holatiga ularning O‘zbekiston bank tizimining aktivlardagi ulushi 67 foizni tashkil etmoqda.
Tizimli ahamiyatga molik banklarni aniqlashda quyidagi mezonlardan foydalanildi:
- bankning aktiv va majburiyatlari hajmi;
- bankning bank tizimi ishtirokchilari bilan o‘zaro bog‘liqligi;
- bankning qamrovi;
- bank operatsiyalari murakkabligi.
Tizimli ahamiyatga molik banklarni aniqlash bo‘yicha hisob-kitob natijalariga ko‘ra, Bank nazorati qo‘mitasi tomonidan quyidagi banklar 2025-yil uchun mahalliy tizimli ahamiyatga molik banklar sifatida belgilanmoqda:
- “O‘zmilliybank” AJ
- “Agrobank” ATB
- “O‘zsanoatqurilishbank” ATB
- AT “Xalq banki”
- “Ipoteka-bank” ATIB
- “Kapitalbank” ATB
- “Asakabank” AJ
O‘z navbatida, tizimli ahamiyatga molik deb topilgan banklar uchun alohida bank nazorati o‘rnatiladi. Tizimli ahamiyatga molik banklarning to‘lovga qobiliyatli bo‘lishi nafaqat moliya tizimining, balki butun iqtisodiyotning barqarorligini mustahkamlashga xizmat qiladi.
