Tadqiqot stipendiyasi
Markaziy bank yosh tadqiqotchilar uchun Tadqiqot stipendiyasi dasturini e’lon qiladi
O‘zbekiston Respublikasi Markaziy banki magistratura va doktorantura bosqichida tahsil olayotgan talabalar hamda mustaqil izlanuvchilar uchun Tadqiqot stipendiyasi dasturi bo‘yicha tanlov e’lon qiladi.
Dastur yosh tadqiqotchilarni iqtisodiyot va moliya sohasidagi dolzarb mavzularda ilmiy izlanish olib borishga jalb etish hamda ularning amaliy bilim va ko‘nikmalarini rivojlantirishga qaratilgan.
Tanlovda ishtirok etish uchun nomzodlar quyidagi hujjatlarni taqdim etishi lozim:
— tarjimayi hol / rezyume;
— ilmiy tadqiqot rejasi (tadqiqot savollari va maqsadi aniq ko‘rsatilgan holda 1 500–2 500 ta so‘zdan iborat bo‘lishi kerak);
— dastur davomida bajarilishi rejalashtirilgan ishlarning oyma-oy reja-grafigi;
— mavjud bo‘lsa, oldin chop etilgan ilmiy maqolalar.
Tadqiqot mavzulari Markaziy bankning asosiy vazifalari, strategik maqsadlari va ustuvor tadqiqot yo‘nalishlari, global iqtisodiy, moliyaviy va texnologik tendensiyalar, shuningdek, moliya-iqtisod sohasidagi dolzarb muammolar va yangi fenomenlar bilan bog‘liq bo‘lishi lozim.
Tanlovdan muvaffaqiyatli o'tgan nomzodlar bilan tadqiqot mavzusining murakkabligiga asosan 3 oydan 12 oygacha bo'lgan muddatga shartnoma tuziladi
Magistratura bosqichida ta’lim olayotgan tanlov g‘oliblariga davlat oliy ta’lim muassasalaridagi assistent-o‘qituvchining oylik maoshi (7 620 142 so‘m) miqdorida, doktorantura bosqichida ilmiy izlanish olib borayotgan tanlov g‘oliblariga katta o‘qituvchining oylik maoshi (8 568 102 so‘m) miqdorida stipendiya to'lanadi. Bundan tashqari, tadqiqotchilarga quyidagi imkoniyatlar taqdim etiladi:
- Markaziy bankning ichki statistik ma’lumotlaridan foydalanish;
- Tadqiqot natijalarini Markaziy bank seminar va konferensiyalarida taqdim etish;
- Tadqiqot xulosalarini amaliyotda qo‘llash imkoniyati.
