2026 yilning I choragida O‘zbekiston iqtisodiyoti yuqori sur’atlarda o‘sishda davom etdi. Bunda ichki talabning yuqori bo‘lishi, investitsiyalar oshishi hamda xizmatlar, qurilish va savdo sohalaridagi faollik muhim omil bo‘ldi. Natijada, 2026 yil I choragida iqtisodiyot 8,7 foizga o‘sdi. Shu asosda yillik iqtisodiy o‘sish prognozi 7–7,5 foizgacha oshirildi.
Inflyatsiya pasayishda davom etdi va 2026 yil mart oyida 7,1 foizni tashkil qildi. Bazaviy inflyatsiya esa 5,7 foiz bo‘ldi. Inflyatsiyaning pasayishiga asosan o‘tgan yilgi yuqori baza ta’sirining kamayishi hissa qo‘shdi. Shu bilan birga, so‘nggi oylarda inflyatsiyaning pasayish sur’ati sekinlashgani iqtisodiyotda inflyatsion bosimlar saqlanib qolayotganini ko‘rsatmoqda.
Mart oyida inflyatsion kutilmalar ham pasaydi, ammo ular hali ham prognoz darajalaridan yuqori bo‘lib turibdi.
Geosiyosiy vaziyatning keskinlashishi tashqi iqtisodiy noaniqliklarni oshirdi. Jahonda energiya va oziq-ovqat narxlarining yuqori bo‘lishi, logistika va transport xarajatlarining qimmatlashishi import orqali inflyatsion bosimlarni kuchaytirishi mumkin.
Shu bilan birga, oltin narxlarining yuqori bo‘lishi, eksport tushumlari barqarorligi, pul o‘tkazmalari o‘sishi va hamkor davlatlar valyutalarining mustahkamlanishi ichki valyuta bozorida xorijiy valyuta taklifini qo‘llab-quvvatlamoqda.
Ijobiy real foiz stavkalari aholining milliy valyutada jamg‘arma qilishini rag‘batlantirmoqda va kreditlar o‘sishining muvozanatli bo‘lishiga yordam bermoqda.
Yangilangan prognozlarga ko‘ra, 2026 yil yakunida inflyatsiya 6,5 foiz atrofida bo‘lishi kutilmoqda.
Markaziy bank inflyatsiya dinamikasi, inflyatsion kutilmalar, yalpi talab sharoitlari, almashuv kursi tendensiyalari hamda tashqi xatarlarni diqqat bilan kuzatib boradi.
Markaziy bankning pul-kredit siyosati inflyatsiyani o‘rta muddatda 5 foizlik maqsadli darajaga pasaytirish, makroiqtisodiy barqarorlikni ta’minlash hamda aholining xarid qobiliyatini saqlashga qaratilgan bo‘lib qoladi.
