Toshkentda Moliyaviy dasturlash va siyosat bo‘yicha seminar boshlandi

Tadbir Kavkaz, Markaziy Osiyo va Mo‘g‘uliston mamlakatlari uchun salohiyatni oshirish mintaqaviy markazi (CCAMTAC) va Xalqaro Valyuta Jamg‘armasi (XVJ) ko‘magida, O‘zbekiston Respublikasi Markaziy banki hamkorligida tashkil etildi.

Seminarda asosiy makroiqtisodiy institutlar vakillari – O‘zbekiston Respublikasi Markaziy banki, Iqtisodiyot va moliya vazirligi, shuningdek, O‘zbekiston Respublikasi Milliy statistika qo‘mitasi mutaxassislari ishtirok etishmoqda. Dastur makroiqtisodiy siyosatni tahlil qilish, moliyaviy dasturlash hamda prognozlash va rejalashtirishda statistik ma’lumotlardan foydalanishning muhim jihatlarini qamrab oladi.

Mazkur seminar milliy institutlarning tahliliy salohiyatini kuchaytirishga, mutaxassislarning kasbiy mahoratini oshirishga, shuningdek, turli ssenariylar doirasida iqtisodiy moslashuvni baholash uchun amaliy siyosiy tahlil vositalari bilan ta’minlashga qaratilgan.