2026-yil I choragida mehnat bozori faolligi yuqori darajada saqlanib qoldi. Mart oyida bo‘sh ish o‘rinlari soni o‘tgan yilning mos davriga nisbatan 9,8% ga oshib, ishchi kuchiga talab ayniqsa xizmatlar, chakana savdo, umumiy ovqatlanish va ishlab chiqarish sohalarida yuqori shakllandi. Faol rezyumelar sonining 31,5% ga oshishi esa mehnat bozorida raqobat kuchayganini ko‘rsatdi.
Korxonalarning ishchilarni yollash bo‘yicha ijobiy kutilmalari saqlanib qoldi. Bandlikning o‘sishi asosan xizmatlar sohasi va xususiy sektor hisobiga shakllandi, ishsizlik darajasi esa 4,8% ni tashkil etdi.
I chorakda nominal ish haqi 17,4% ga, real ish haqi esa 9,5% ga oshdi. Ish haqi o‘sishi moliyaviy xizmatlar, transport va boshqa xizmat ko‘rsatish sohalarida yuqori bo‘ldi. Shu bilan birga, real ish haqi o‘sishining mehnat unumdorligidan yuqori shakllanishi inflyatsion bosimlarning saqlanib qolayotganini ko‘rsatmoqda.
Pul o‘tkazmalari hajmi 3,8 mlrd AQSH dollarini tashkil etib, o‘tgan yilning mos davriga nisbatan 13% ga oshdi. Mehnat migratsiyasi yo‘nalishlarini diversifikatsiya qilish davom etib, Turkiya va Janubiy Koreyada bo‘lib turgan O‘zbekiston fuqarolari soni oshdi.
Qisqa tavsif bilan havola orqali tanishing
To‘liq sharh bilan havola orqali tanishing
