Markaziy bank rahbariyatining navbatdagi qabulida fuqaro va tadbirkorlik subyekti vakilining kredit majburiyatlariga oid murojaatlari muhokama qilindi. Murojaatlar kredit to‘lovlari muddatlarini qayta ko‘rib chiqish, kredit ta’tili olish hamda kredit shartnomalarini bekor qilish bo'yicha masalalar ko'rib chiqildi.
Tadbirkorlik subyektining murojaati Mikrokreditbank ATBdan olingan kreditlar bo‘yicha to‘lov muddatlariga taalluqli bo‘lib, korxona vakili kreditlarning yakuniy qaytarish muddatini uzaytirish hamda kredit ta’tili berilishida ko‘mak so‘radi.
Shuningdek, Anorbank, Ipoteka-bank, Milliy bank, TBC Bank va boshqa kredit tashkilotidan kredit olgan fuqaroning murojaati ko‘rib chiqildi. Fuqaro hozirda sog'lig'idagi o'zgarishlar sabab davolanayotganini ma’lum qildi. U ushbu holatlarni inobatga olgan holda, kredit shartnomalarini bekor qilish masalasida amaliy yordam so‘radi.
Murojaatlarni banklar bilan hamkorlikda o‘rganish hamda ularda bayon etilgan masalalarga yechim topish imkoniyatlari yuzasidan fikr almashildi.
