O‘zbekiston Respublikasi Markaziy banki va Serbiya Milliy banki o‘rtasida hamkorlik memorandumi imzolandi.
Mazkur hujjat ikki mamlakat markaziy banklari o‘rtasida jinoiy faoliyatdan olingan daromadlarni legallashtirish, terrorizmni moliyalashtirish hamda ommaviy qirg‘in qurollarini tarqatishni moliyalashtirishga qarshi kurashish sohasidagi hamkorlikni rivojlantirishni nazarda tutadi.
Shuningdek, Memorandum doirasida fintex innovatsiyalari, ochiq banking
(Open Banking), markaziy banklarning raqamli valyutalari (CBDC), tartibga soluvchi “regulyator qumdon” mexanizmlari hamda risklarni baholash metodologiyalari bo‘yicha bilim va amaliy tajriba almashish ko‘zda tutilgan.
Memorandum markaziy banklar o‘rtasidagi professional va ekspertlik muloqotini mustahkamlash, tegishli yo‘nalishlarda ikki tomonlama ishchi uchrashuvlar, o‘quv tadbirlari va seminarlar tashkil etish, shuningdek, ilg‘or tajriba va zamonaviy yondashuvlarni o‘zaro almashishga ko‘maklashishga qaratilgan.
