2019 yilning 17 iyul – 2 avgust kunlari davomida Markaziy bankka tashrif buyurgan Xalqaro valyuta jamg‘armasining (XVJ) pul-kredit va moliyaviy statistika bo‘yicha texnik ko‘mak missiyasi bilan hamkorlikda XVJning yangi tahrirdagi “Pul-kredit va moliyaviy statistikasini shakllantirish bo‘yicha qo‘llanmasi” talablaridan kelib chiqib, O‘zbekiston Respublikasi bo‘yicha pul-kredit statistikasini yuritish amaliyoti takomillashtirildi.
Xususan, Markaziy bank tomonidan shakllantiriladigan pul-kredit statistikasi sharhlari va ma’lumotlariga quyidagi o‘zgartirish va qo‘shimchalar kiritildi:
1. “Markaziy bank sharhi” bo‘yicha:
- Markaziy bank sharhining, undagi moliyaviy aktivlar va instrumentlarning iqtisodiyot sub’ektlari (sektorlari) hamda rezidentlik mavqei bo‘yicha ajratilgan holdagi kengaytirilgan yangi shakli ishlab chiqildi;
- tijorat banklarining Markaziy bankdagi chet el valyutasidagi vakillik hisobvarag‘idagi mablag‘lar pul bazasi tarkibiga kiritildi.
2. “Bank tizimi (depozit korporatsiyalari) sharhi” bo‘yicha:
- fuqarolarning aksiyadorlik tijorat Xalq bankida ochilgan shaxsiy jamg‘arib boriladigan pensiya hisobvaraqlaridagi mablag‘lar, ulardan mablag‘ egalarining istalgan vaqtda foydalanish imkoniyati chegaralanganligi sababli, pul massasi tarkibidan chiqarildi;
- O‘zbekiston Respublikasi Tiklanish va taraqqiyot jamg‘armasi tomonidan iqtisodiyot tarmoqlaridagi investitsion loyihalarni moliyalashtirish uchun tijorat banklariga berilgan kredit mablag‘lari tijorat banklarining Hukumat oldidagi majburiyatlari sifatida qayta tasniflandi;
- sharhdagi moliyaviy aktivlar va instrumentlarning iqtisodiyot sub’ektlari (sektorlari) hamda rezidentlik mavqei bo‘yicha ajratilgan holdagi kengaytirilgan yangi shakli ishlab chiqildi;
- amaldagi sharh nomi “Depozit tashkilotlari (bank tizimi) sharhi” deb qayta nomlandi.
3. Pul-kredit statistikasi sharhlarida tijorat banklari bo‘yicha alohida “Boshqa depozit tashkilotlari (tijorat banklari) sharhi”ni shakllantirish yo‘lga qo‘yildi.
Yuqoridagilardan kelib chiqib, 2019 yilning dekabr oyidan boshlab, O‘zbekiston Respublikasi bo‘yicha pul-kredit statistikasi kengaytirilgan yangi shaklda e’lon qilib boriladi.
Shuningdek, Markaziy bank veb-sayti, XVJning kengaytirilgan Ma’lumotlarni tarqatishning umumiy tizimi (k-MTUT) hamda boshqa statistik axborot tizimlarida joylashtirilgan pul-kredit statistikasi bo‘yicha tarixiy ma’lumotlar ham yangilangan shaklda qayta joylashtirilishi ma’lum qilinadi.
Yuqoridagi Pul-kredit statistikasi bilan quyidagi havola orqali tanishishingiz mumkin
